الفوكس يعنى التركيز ويطلق اصطلاحا على المنطقة التى يكون عليها التركيز أكتر فى الصورة يعنى المنطقة اللى بتكون واضحة وحادة أكتر من غيرها
درس النهاردة عن الفوكس وده من أهم العناصر اللى بتتحكم فى جودة الصورة
أول شئ لازم أراعيه لما أجي أصور هو ان نقطة الفوكس تكون على التكوين الأساسى أو الجزء الأساسى فى الصورة .. فكرة الفوكس هو المسافة اللى عندها الصورة بتبقى واضحة ولما بحرك حلقة الفوكس المسافة دى بتتغير بتقرب أو تبعد المسافة دى اسمها ( الفوكاس ديستانس )
وكل عدسة بيبقى ليها مكتوب عليها أقل فوكاس ديستنانس تقدر تقرب من الجسم اللى بنصوره فيها ودى اسمها Minimum focus distance
الفوكس ليه طريقتين مانويال وأوتوماتيك ..
الفوكس اليدوى Manual Focus:
هو إنك بتحرك حلقة الفوكس الموجودة فى العدسة بإيدك لحد ما توصل للفوكس المطلوب ” أغلب الكاميرات بيبقي فيه في الفيو فايندرسهم او سهمين فوق على الشمال بيتحركوا مع الفوكس المانويال وبيختفوا او شكلهم يتغير اول ما تبقي الحاجة في الفوكس – راجع كاتالوج كاميرتك لتفاصيل أكتر “
الفوكس الأوتوماتيكي AutoFocus :
فى الحالة دى الكاميرا اللى بتعمل فوكس على الجسم اللى انت بتصوره وده اللى هنشرحه بالتفصيل فى اللى جاى ..
تقنياً عشان الكاميرا تعمل فوكس فى حاجة اسمها فوكس سينسور هو اللى بيتحكم فى الاوتو فوكس عن طريق الخطوات دى واللى بتتم فى جزء من الثانية بيختلف من كاميرا للتانية :
1- بيبدء يغير فى الفوكس ديستانس يحرك حلقة الفوكس عشان يظبط الفوكس على الجسم اللى فى نقطة الفوكس
2-معالج الفوكس الأوتوماتيكى ( سينسور الفوكس ) بيقيم الفوكس ده عشان يشوف لو محتاج يتحسن
3-بيبدء يعمل تحسين للمسافة دى عشان يجيب أفضل فوكس ممكن
4-ممكن سينسور الفوكس يعيد الحاجتين اللى فاتوا دول لحد ما يوصل لعملية الفوكس السليمة