كتبت ( منال ظفور ) عن : حكاية الرقص (رقذو)… وهز الخصر واﻵجوشايا (الرقصة الدورانية) وبعل مرقذ ( اله الرقص ) و الهجع و الميلوية ( الدراويش )….- مشاركة ‏منشور‏ ‏‎Manal Zaffour‎‏ و كل من ‏‎Salman AlAhmad‎‏ و‏ملتقى زينون السوري‏

حكاية الرقص (رقذو)…
وهز الخصر واﻵجوشايا (الرقصة الدورانية) وبعل مرقذ (اله الرقص) والهجع والميلوية (الدراويش)….
من اسطورة عشتار : “”..ولما هجم الخنزير البري المتوحش (أحد جنود الهة الموت) وغرز قرنو بأسفل بطن تموز اللي صرخ صرخة مدوية وصلت للسما لعند اﻵلهة عشتار..وصار يتلوى من الوجع ويميل عاليمين وعاليسار وارتعش جسمو من اﻷلم وبلش ينزف جرحو لحتى وقع عاﻷرض غرقان بدمو وفقد الوعي لحتى غاب وفقد الحياة..ونزلت عشتار بسرعة لعندو عاﻷرض وبلشت تندب وتولول وتضرب عاصدرا وتنوح وصارت تتمايل وتجوح وتحرك تموز وتهزو وتضربو عا وشو لحتى تصحيه (هالمشهد منشوفو لما اﻷم السورية بتشيع ابنها الشهيد)وتتلوى وترجف وتتحرك وتدور حول نفسها ..وصارت تعمل نفس حركات تموز بلحظاتو اﻷخيرة كمحاولة منها لترجعلو الحياة ..وصارت كل المخلوقات تعمل متلا ويقلدوها حتى النباتات واﻷشجار هزو وراقن ليشاركوها حزنها والنساء صارت تتلوى وتتمايل وتهز خصرها بشكل سريع (وهو تمثيل للحظة غرز قرن الخنزير ببطن تموز ورعشته وشعوره باﻷلم الفظيع) وكل هالشي ﻹعتقادن بإنن وبتقليد الحركات اﻷخيرة لإله القتيل عم يساعدو الربة عشتار لترجعلو الحياة..ولكن عبث..ﻷنو إلهة الموت خطفتو وأخدتوللعالم اﻷسفل وسحبت منو الحياة..””(هون تفسير نشأة الرقص الشرقي وهز الخصر)..
لكن عشتار أرادت من مخلوقاتها انو يتعلموا معنى الصراع والتمسك بالحياة ﻵخر لحظة وما يتخلوا عنها بسهولة..لتزرع فيهم ثقافة الحياة وتخفيف فكرة الموت عنهن ﻷنو هو محطة عبور لابد منهاا للعودة للحياة..فحصاد الحنطة والحبوب والثمار هو تمثيل لفكرة الموت المؤقت..وحرث اﻷرض وطمر البذور فيها وانتظارها لتنبت عن جديدهو تعبير عن فكرة (ضرورة الموت لتولد وتبعث الحياة من جديد..وهالفكرة هي جوهر عقيدة الخصب السورية وتعليم عشتار الزراعة لﻹنسان)..وطبعا صارت هالحركات (الرقص الشرقي) هي تعبير عن الحاجات العاطفية بتمارسها النساء وكان اسمن (قاديشتو..أو كاهنات عشتار)…بالرسوم الجدارية والنقوش بآثارنا بتظهر النساء بحركات راقصة والرجال عازفين على اﻵلات الموسيقية…
و بميثولوجيا وأساطير الكنعانيين والفينيقيين تبين انن هنن أول مين تبنى واخترع اله للرقص اسمو (بعل مرقذ)و معبدو موجود ب بيت مري بلبنان كانت عبادتو بتم عن طريق تأدية رقصات دورانيةة مقدسة..
منرجع لﻹسطورة :””ولمن شافت عشتار انو تموز مات وصار بالعالم اﻷسفل ..غضبت كتير وصار الشرر يتطاير من عينيها..فقام اله الخلق واﻹبداع( إيا) بخلق (صلتو) ند لعشتار ليواجهها ويخفف منن غضبها وشراستها ويسحب ميلها للنزاع والشجار مع آلهة الموت وليشبع غريزتها الحربية ويفرغ احتقان عدوانيتها اللي خلقت بلحظة موت تموزاله الخصب..وصار صلتو يقلدها ويعمل نفس حركاتهاويتلوى ويميل ويلف ويدور مقابل عشتار (اللف الدوراني) ويزمجر ويطلق أصوات الغضب (هي نفس اﻷصوات اللي بيطلقها المحارب أثناء الحرب قديما)””
هيك نشأت الرقصة الدورانية اللي اسما بالسرياني (آجوشايا)وصارت لقب من ألقاب عشتار..الفعل جاشو يعني اللف الدوراني..وطقوس هالرقصة انو يتنكروا الرجال بزي النساء وبتحمل النساءء اﻷسلحة وبيرقصوا كلن رقصة عشتار المقدسة (الرقصة الدورانية) أو رقصة الحرب ﻷنو هالرقصة بتساعدن على توحيد حركاتن وامتلاك الشجاعة والحماسة لمواجهة القوى الشريرة حتى الموت.. والسوريين القدماء وخاصة التدامرة كانوا يرقصوا رقصة نزال الموت وهي نفسها رقصة الحرب..ولهﻷ في عنا بسوريا رقصة بتشبهها اسمها الرقص الشيخاني..والسيد المسيح قبل تسليم نفسو جمع حوارييه لتأدية رقصة دورانية مقدسة..وقال للحواريين:
ألوهوثو بكروخيو…..دأب اﻷلوهةالدوران
نوفاحنو بابوبو …..سأنفخ بالمزمار
دثرقذون كلخون كريخوييت…لترقصوا كلكم دورانا
واينو دانقاليل عال رقذو…ومن يتقاعس عن الرقص
عبار علوي روزو داكنوشيو…فاته سر هذا اﻹجتماع
..وصارت كاهنات عشتار باﻹضافة للرقصة الدورانية يمارسوا طقوس رقصة (الهجع) اللي هي باﻹضافة لهز الوركين واﻷكتاف بتقوم الراقصة (الكاهنة) بحل شعرها وبتهزو بالهوا عالجنبين يمين ويسارر وبشكل عنيف وسريع على إيقاع الطبلة الجلدية (الدمبك ولهﻷ هالرقصة موجودة بالعراق) وبعدين بتثني ركبها وبترجع لورا لحتى تلامس اﻷرض براسها وشعرها مفرود عاﻷرض وبتحركو حركة دورانية وبعدين بتوقف بتركل اﻷرض برجليها بقوة وبتعيد الحركة أكتر من مرة كأنو بدها من هالحركات انو تفيق اﻷرض النايمة بسبات استمر طول فصل الشتي (يعني لتفك أسر تموز اله الخصب من العالم اﻷسفل ليرجع لﻷرض والحياة وينبت الزرع من جديد)..
بالقرن السابع الهجري أعاد جلال الدين الرومي إحياء الرقص الدوراني وطقوسها للفرقة الميلوية (الدراويش) واللي مازالت شائعة ببلاد الشام لليوم وفيها بيقوم المتصوف الراقص بالدوران (باسطاا ذراعيه) اللي بيرسموا حوله دائرة بيكون هو مركزها ويعني دوران حول مركز الحق اللي بيتلمسو الصوفي بداخله وطبعا الرقصة مؤلفة من عشر حركات …وكمان فريضة الحج بتفرض الدوران حول مركز الحق الكعبة..وجميع مزارات أولياء الله الصالحين وفوقها قباب دائريةالها مركز بيتوسطها مركز الحق متل اللي بالكنايس والجوامع..
بيقول محي الدين بن عربي عن دائرة الحق :””..دائرة الوجود أولها حب وافتراق،وآخرها حب وتلاق،محورها الحق ومحيطها ما لا يحصى من جمال الوجود ، الكل يخرج من المركز والكل إليه يعود “”
هيك متل ما شفنا باﻹسطورة والتاريخ نشأ الرقص من عمق اﻷلم والوجع بعقيدة الخصب العشتارية …وتعريف الرقص هو: عبارة عن حركات أعضاء جسم اﻹنسان يؤديها بأطرافه اﻷربعة وبترافقهه الموسيقا واﻷغاني والتمثيل لدعم قصة أو رواية وطبعا نشأ علم للرقص بيبحث بكيفية صدور الحركات الموزونة من شخص بيقدم رسالة أو المتعة والفرح للمشاهدين…والرقص لغة عالمية بيشبه الموسيقا ﻷنو مابيحتاج ترجمة وهو ثقافة وفن وتعبير عن اتسجام حالة بتربط المشاعر اﻹنسانية بالجسد وبالكون والمحيط وبتناغم جميل مع الموسيقا وانخلق مع بداية الحضارة واتطور معها.. وعبر التاريخ ارتبط بالمعتقدات والطقوس واﻷديان اللي كانت شعوب اﻷرض بتآمن فيها ..فكان الرقص هو التعبير الجماعي للشكر للﻵلهة على كل شيء..فكان رقص النصر والفرح والحزن..ورقص للزراعة ومواسم الخير والصيد الوفير..ورقص لطرد الشر والتعبير عن السعادة ورقص لجلب المطر وطلب المساعدة والدفاع عن اﻷرض ورقص جنائزي لتقديم القرابين..وكمان ارتبط بنشوء المسرح وتطوره عند السوريين ﻷنو كان هو الطريقة الترفيهية لتقديم فقرات وروايات بتحكي حكايا وقصص وأساطير كلها بتشرح الصراع بين الخير والشر… .
ايه .. وهﻷ يا سوريين بعرف انو انفرض علينا نرقص رقصة نزال الموت من قوى الشر بالعالم… ورقصنا رقصة جنائزية بعد ما قدمنا القرابين…
حان الوقت لنرقص مع بعض وكلنا سوا رقصة مقدسة رقصة شكر لﻵلهة واﻷرض السورية نطلب فيها الخير والبركة والمحبة لبلدنا ولكل مين ضحى كرمالها لحتى ترجعلها الحياة ﻷنو أنتو أبناء الحياةة فيكن بتحيا سوريا .. وتحيا سوريا..