كان لـ إيجيبت توداي بالعربي هذا اللقاء مع أسطورة الغطس أحمد سمير فراج
- إيه حكايتك مع الغوص؟ بدأت إزاي؟
بدايتي طبعا السباحة.. كنت مرتبط جدا بالميه .. وزي أي حد عاوز يعمل رياضة في شرم الشيخ أو الغردقة أو دهب ويستمتع دخلت الـ (scuba diving) كرياضة فيها مغامرة وعجبتني جدا.. درست كورسات كتيره لكن عمري ما كنت أتخيل إنها هتكون مجال عملي..
- بنسمع دايما عن السكوبا دايفين والدييب دايفين.. عاوزين نفرق بين أنواع الغوص؟
الغوص أنواع متعددة.. فيه (Recreational Diving) الناس بتيجي تغطس عشان تتفرج على الأسماك والكائنات البحرية وده بيكون بتانك واحد وبيكون على عمق اقصاه 40 متر.
فيه (Technical Diving) وده بيكون أعمق وبيكون الهواء في التانك فيه عبارة عن مخاليط من الغازات.
وفيه (Free Diving) اللي هو انك تاخد نفس وتنزل من غير تانك تحت الميه.. وما بيكونش قريب من سطح البحر، فيه ناس بتحقق ارقام فيه بتعدي الـ200 متر.. آخر رقم عالمي كان 209 متر.
وآخر نوع الـ (Commercial Diving) ده لحام وقطع وفك وتركيب ونسف وتدمير تحت الميه بيستخدم لشركات البترول والكهرباء.
كخبير في الغطس ومدرب محترف ما هي نصائحك للمبتدئين وما هي الأوقات الأنسب للغوص في السنة؟
الجو في مصر من أجمل أجواء العالم، فالشتاء عندنا ما بيكونش برد جدا.. ده غير ان فيه بدل غوص للشتاء.. عشان كده ما فيش وقت معين للغوص.. لكن الموسم دايما بيكون وقت الاجازات.. الناس عندها معتقد إنها ما تغطسش في الشتا عشان الميه بتكون ساقعه بس ده معتقد غلط لإن سكوبا دايفين Scuba Diving معناها الغوص بمعدات ذاتية التحكم.. فيه احد المعدات الـ (wet suit) البدلة بيدخل فيها ميه بتاخد حرارة الجسم وبيكون فيه عازل فما بنحسش بالبرد..
بالإضافة لإن كل فصل في السنة له الأحياء المائية والحياة البحرية الخاصة به فالغطس في كل موسم بيكون متعة مختلفة..
- متى يمكن للمبتديء أن يغوص بنفسه منفردا؟
كورس الغوص الأول بيكون في المياه المفتوحة لمدة 4 أيام بيعرفك بعلم الغوص ومعدات الغوص.. بعدها بتكون مؤهل للغوص في أي مكان في العالم. لكن لازم تغوص مع (بادي) زميل .. وده لأسباب منها إنك لو احتجت حاجه تلاقي حد يساعدك وكمان المتعة في الغطس وانت معاك زميل غير وانت لوحدك بتكون المتعة اكبر وانت معاك صحبه.. كمان بيحصل تبادل خبرات.
مصر تتميز إنها من أجمل مناطق الجذب في العالم لرياضة الغوص.. إيه أهم المناطق فيها وليه؟
مصر من أجمل وأميز الأماكن اللي ممكن تغطس فيها في العالم كله بسبب الجو أكيد وبسبب البحر الأحمر اللي بيتميز بصفاء مياهه وأحيائه المائية..
جنوب البحر الأحمر (مرسى علم – الغردقة – حماطه…) وشمال البحر الأحمر (سيناء.. دهب – طابا – شرم الشيخ – نويبع) .. كل منطقة منهم تتميز بأحياء مائية مختلفة في النوع والشكل والحجم.. إلى جانب البحر الأبيض المتوسط.
لكن الغطس مش بس أحياء مائية.. إحنا أحيانا بنغطس عشان نتفرج على تاريخ زي مراكب غرقانه من أيام الحرب العالمية الثانية، أو آثار زي الآثارالغارقة في اسكندرية.. كل ده بيخلي مصر منطقة جذب سياحي للغطس بكل أنواعه.
- لماذا تعتبر دهب من أكثر المناطق تميزا في مصر برياضة الغوص؟
دهب.. مكان بيتميز بالـ (natural diving) .. لإن فيها كهوف تحت الميه فبتغلب على الغوص فيها شكل المغامرة.
ك / أحمد سمير فرج عضو اللجنة الفنية في الإتحاد المصري للغوص ومحقق في قسم التحقيقات التابع للإتحاد المصري للغوص.. أكيد عملك بيتطلب مهارات خاصة جدا .. ما هي اسباب الحوادث التي صادفتها في مجال عملك؟
ده صحيح.. لكن أحب أأكد الأول إن الـ (سكوبا دايفين) أمان.. إحنا بنغطس عشان المتعة.. الخطر اللي ممكن نواجهه في الغوص ممكن نواجهه في كل حاجه في حياتنا.. النهارده واحنا بناكل لو ما اخدناش بالنا بنكون في خطر.. لو واحنا سايقين ما التزمناش بالتعليمات الخاصة بالقيادة بنكون في خطر اكبر..
- في 18 قضية تم التحقيق فيهم بمعرفتك.. هل فيه خطأ مشترك بينهم؟
كان فعلا فيه عامل مشترك.. لكن مع مجهودات الإتحاد المصري للغوص بنحاول إننا نتجنب هذه المشكلات إنها تحصل مره ثانيه…
أهم المشكلات إنك تتعدى العمق المسموح في رخصتك بتعرض نفسك للخطر.. كل دورة بيتعلمها الغواص بيكون لها مهارات معينة اتعلمها واتدرب عليها بتسمح له بالغوص لعمق معين..
زمان كان الناس بتحاول تغطس بالتانك الواحد ويحاولوا يعدوا العمق المسموح به الـ 40متر.. لما بيعدي العمق ده بيحصل مشاكل مع الغاز الخليط اللي في التانك تبدأ المشاكل بحاجه اسمها (سكر الأعماق) وبعدها بيحصل (تسمم الأكسجين) .. ده لإنهم ما اخدوش المعدات الصحيحة لهذا العمق…
لكن لومعانا المعدات الصحيحة والمرشد الصح يبقى الغوص هيكون متعه.
- Blue Hole المعروفة بمقبرة الغواصين.. لماذا اطلق عليها هذا الإسم وكيف يمكن تجنب مخاطرها؟
البلو هوول من أجمل الأماكن اللي الواحد ممكن يغطس فيها.. لكن هي عباره عن فتحة مقفولة جزئيا.. جزء منها مفتوح على المياه في عمق اقصاه 9 متر ممكن تعدي من ال saddle وتدخل البلوهول.. وفيه غطسة تانية بتكون إننا بندخل البلوهول ونطلع برا عن طريق ال saddle وده الغطس اللي بيكون بتانك واحد.. فيه طريقة تانيه بمخاليط غاز معينة وفيه فتحه تانيه في البلو هول بتبدأ من 52متر وتوصل لـ 90متر من جوه البلو هوول ومن برا لـ 120متر وأعمق…
المنظرمن جوه البلوهول أما تبص لفوق تشوفي الشمس كده نازلة .. او وانت داخل (الأرش arch) اللي على بعد 52 متر كإنه نفق ضخم كبير .. منظر طبيعي جميل..
معظم حوادث البلوهول بسبب إن فيه ناس منهم بتغطس بتانك واحد وبيكون نفسه يشوف الأرش ده لإنه قرأ عنه أو شاف صوره.. بدل ما يتعلموا أو ياخدوا كورس عشان يغطسوا غطسه سليمه، كانوا بيحاولوا يتفقوا مع المرشد فبيرفض لإن ده ضد القواعد المعروفة .. فكان أحيانا حد يقرر إنه يسيب المرشد عند ال saddle وينزلوا تحت في البلوهول للـ 52 متر وطبعا الغاز ما بيكونش كافي أو يحصل لهم سكر الأعماق أو يتوهوا في البلوهول أو بيحصلهم فزع مفاجيء وخوف فيحاول يطلع فجأه على السطح.. دي كلها حوادث بتحصل مع الـ Recreational diving..
فيه حوادث بتحصل مع ال technical diving .. لما بيحاولوا يتعدوا العمق أو يتعدوا الوقت وبيكونوا مش حاسبين الغاز بتاعهم بشكل صحيح وبينسوا إن الإنفعال أو الخوف ممكن يستهلك غاز أكتر عن المحسوب وبتاخدهم المتعة فيفضلوا لوقت أطول من المفروض.. فيبدأ يطلع بسرعة عشان الغاز بيقل منه ومفروض إن على كل عمق لازم يقف وقفة معينة عشان يطلع الغاز اللي في جسمه مع الزفير.. لكن ساعات بيخاف ويبدأ يطلع بسرعة وما يعملش الوقفات دي.. فتحصل الحادثة..
نوع أخيرمن الحوادث إن ناس بتحاول تعمل ارقام لنفسها من غير دراسة ولا تحضير..
ده مختلف عن الرقم اللي حققه أبطال زي أحمد جبر.. الناس دي بتدرس لفترة طويلة .. ما بيكونش طلعت في دماغه فجأه.. بيسخر حياته للهدف ده.. يغطس .. ويحسب ويشتري معدات ويعدل عليها ويبحث كتير لسنين عشان يثبت علم جديد أو يزيد على علم الغوص ..
الأرقام القياسية بتحتاج علم ومجهود كتير.. ما حدش كان يتصور إننا نطلع القمر..كان آخرنا إن عندنا طيارة.. لكن واحده واحده مع العلم وصلنا للقمر..
لقب Undertaker .. ايه حكايته؟
من 2003 كنت عضو اللجنة الفنية في الإتحاد المصري للغوص.. في 2006 حصل إنفجار على الممشى في دهب.. كنت مكلف بإنتشال الأشلاء من الميه وتم إنتشال الأشلاء بالفعل..
للوصول إلى مكان الاشلاء الصح مع طبعا عامل الوقت اللي مهم جدا، فيه دراسة وعلم اسمه search and recovering وفيه دورات وكورسات تانيه مهمه.. بعدها مهم إنك توصل للمعلومة الصح من الناس (كان نازل الساعه كام وكان مين معاه وكان معاه كام كيلو عشان تحدد مكانه المفترض) وتحدد رؤيتك وتصورك للموقف وتحدد الموقع وبيكون معانا تصور للغطسة بتاعته عشان نقدر نحدد مكانه..
- هل دايما المهمة إنتشال جثث ولا أحيانا بتكون مهمة ممتعة مثل البحث عن مجوهرات ثمينة أو ما شابه؟
فعلا حصل معايا قبل كده إن حد كان بيغطس معايا فقد خاتم زوجته وكان خاتم ثمين من موروثات العائلة.. كان مهمة صعبة لكن الحمد لله وصلنا له.
عملك كمحقق في حوادث الغرق أكيد خلاك مريت بقضايا غريبة..يا ترى إيه أغرب القضايا اللي صادفتها؟
كان فيه حادثة من الحوادث في البلوهول وبحثنا كتير عن الهدف وما كناش لاقيينه وفي الآخر لقيناه لازق في سقف الأرش.. هو في الأغلب توتر وحاول إنه يطلع.. لقيناه بالصدفة اكتر من اي حاجه..
مش حابب اتكلم عن الحوادث بتفاصيلها عشان ما اجرحش مشاعر الناس اللي بتسمع.. لكن من باب إننا نحذر الناس من خطر التعرض للغرق لا قدر الله في حال عدم اتباعهم التعليمات بدقة ..
اي حد بينزل لازم يكون معاه المعدات الصحيحة ويكون مش بس معاه شهادة معتمدة لكن كمان يكون مؤهل للغوص.. لإن ناس كتير بيكون معاها شهادات للغطس لكن بيكون مر وقت طويل ولم يغطس فبيفقد مهارات الغطس…
فيه حوادث كتير حصلت كان من ضمن مشاكلها عدم استخدام المعدات السليمة.. فيه بدلة بنستخدمها اسمها البدلة الجافة بتكون متوصلة بالتانك عشان نزود فيها الهوا أو نقلله وبتتحكم في الطفو بتاعنا.. فيه ناس كتير بتستعملها بس للأسف بيكونوا مش مدربين عليها كفايه .. لازم وهو طالع بيفضي الهوا من البدلة بالتدريج وفي الوقت المناسب.. إذا ما عملش ده بتبدأ البدلة تاخده بسرعة للسطح وكل ما بنطلع لفوق الهوا اللي جواها بيتمدد وبيبقى اكتر فبيطلع اسرع.. دي من ضمن الحوادث اللي حصلت في شرم الشيخ.. وكان نتيجتها الوفاة بسبب انفجار الرئتين..
تم اختيارك عشان تقدم استشارات فنية وتقنية للفيلم الوثائقي البولندي Deep love .. ممكن تكلمنا عنه؟
يانوش وجوانا.. هم الإثنين بصراحه أبطال… يانوش كان مدرب سكوبا دايفين جاله جلطه في المخ لسوء حظه وهو تحت الميه وحصل له شلل نصفي والجلطه اثرت على الكلام وجزء معين في المخ المسئول عن الذاكرة. هو كان مرتبط بالميه جدا نزل عمل رقم بعد الإصابة.. بعد علاج سنين واشراف فني وكنت مسئول عنه وعملنا فيلم وثائقي عنه… أنا بقول عن جوانا مراته إنها هي كمان بطله لإنها كانت معاه وهو رجل ناجح واستمرت معاه وساعدته بعد الاصابة ولحد النهارده موجوده معاه وحالة حب جميلة ووفاء..
الفكرة في الأسم Deep Love وهو حب جوانا لـ يانوش .. ومن ناحية تانية حب يانوش نفسه للميه.
يانوش حقق حلمه اللي اتمناه إنه يوةصل لعمق 60 مترويشوف الأرش اللي كان نفسه يشوفه في البلوهول.
ايه مشروعاتك الجديدة؟
المشاريع الجديدة إن فيه بحث عن يانوش عشان نثبت إن الجلطة اللي حصلت ليانوش ما كانتش بسبب الغطس على العكس الغطس له اثر إيجابي..
معهد السمع والكلام البولندي عملت اختبار معين ليانوش عشان يحله.. لما حله على الأرض جاب 60% وفي غرفة الضغط جاب 90% وهو نفس الإمتحان لكن اسئلة مختلفة.. نفس الإمتحان حله تحت الميه بنسبة 100%..
المشورع التاني فيلم وثائقي اسمه Two bodies ده جديد بنجهز له عن حادثة حصلت في دهب اتنين مصريين توفوا في الميه .. طلع اقاويل كتير عن الحادثة وبنعمل التحقيق بشكل موثق.. هم كان هدفهم جميل جدا لكن كان معاهم المعدات الغلط..
- لك صور بتكتب فيها تقارير تحت الماء.. اكيد الورق ده من ماده خاصة لكن إيه ضرورة كتابة التقارير تحت الميه؟
هو فعلا بلوك نوت معين من مادة بلاستيكية بنكتب عليها بقلم رصاص معين يمكن مسحها والكتابة عليها مرة أخرى.. احنا بنكتب ملحوظات او مقاييس معينه مهمة.. واحيانا بنكون محتاجين نتكلم تحت الميه ونقول حاجه لبعض خاصة بالتحقيق فبنستخدمها كوسيلة تواصل..
قبل ما يكون فيه البلوك نوتس كان التواصل عن طريق الإشارات..
إزاي الغوص أثر على حياتك الشخصية؟
الغوص قربني كتير من الناس وخلاني اجتماعي اكتر وبحسب الخطر بشكل ادق.. كل الحاجات اللي بنعملها في حياتنا ليهاأخطار وفوائد.. لو كانوا أد بعض يبقى ما ناخدش الخطوة دي.. لازم يكون الفوائد أعلى من الخطر ولو شوية صغيرين.. ودي أهم حاجه اتعلمتها من الغوص..
علمني الغوص إني اكون منظم جدا واتبع القواعد والتعليمات بشكل دقيق..
- تقول إيه للناس اللي عاوزه تتعلم غوص؟
للي عاوزين يغطسوا: الغوص متعه.. انصحك تجرب الغطس
للغطاسين اللي بيغطسوا: ما تعديش حدود العمق ولا الوقت والتزم بالتعليمات
