المنشور 10
الزراعة المائية باوعية بلاستك او اكياس باستخدام وسط كومبوست -رمل-حصى
اول شي تحدد اماكن الصفوف عالسطح طول الصف حسب ماهو متاح معك .عرض الصف ٥٠ سم البعد بين الصف والصف المجاور ٧٥سم
تحدد اطراف الصف بالبلوك وتبطنه بمشمع اسود سميك وتفرش في الحوض المتشكل معك بحص بناء مغسولة تكون ناعمة مو الخشنة ولا الناعمة كتير وبارتفاع ٥ لحد ١٠ سم هيك بتكون جهزت الارضية يلي رح تنحط فوقها اوعية الزراعية او الاكياس لان المحلول المغذي والمياه ستخرج منها الى هذه الارضية وتسيل باتجاه ميل السطح يعني حسب تسليط السطح عالمزاريب هيك مابيصير عندك اي مشاكل او رطوبة كله يتم صرفه
نبدأ الان بتجهيز السطول او التنكات او اوعية البلاستيك او الاكياس انا افضل سطول او تنكات بلاستيك يجي شكلها مربع يستخدموها بالدهانات او للجبن متل يلي بالصور يلي مافيه يجيب منها يستخدم الاكياس مافي مشكلة بس البلاستك احسن لان مارح نبدل الوسط بخمس سنوات
طريقة اعداد الوسط يلي رح نضعه بالاوعية
اولا نثقب الوعاء ثقب من جنب ارتفاع هالثقب عن قاع الوعاء ٥سم ونخلي الميل باتجاهه ميل خفيف لان هاد الثقب رح يصرف المياه الزائدة وفيك تثقب اسفل الوعاء ثلاث ثقوب مافي مشكلة المهم يصرف
نحط داخل الوعاء بحص بناء مغسول بارتفاع ٥ سم ونغطي هالبحص بشاش او قماش المهم مانسمح للرمل يلي رح نحطه فوق بالتسرب للبحص
نضع فوق القماش الخلطة يلي مكونة من
٢ رمل احمر نظيف و ١ سماد كومبوست عضوي متخمر ممكن تستخدم سماد(( المزيرعة ))يلي مابيعرف يصنع كومبوست وتخلط الرمل والكومبوست وانت متخلط تضيف معهم كمشتين او ٣ بحص خشن مهمة البحص هون جعل البيئة مفككة مهواة وتعبي الوعاء البلاستيك لاخر ٥سم وتعطيه مي وكل مانشف تروي لحتا تنتظم المكونات وتاخد حجمها بالوعاء وتزرع بكل وعاء نباتين خيار وتمد لكل نبات معكرونة تنقيط مع حامل واذا زرعت بندورة تحط نبات واحد واذا باكياس يساع ٤ خيار او ٢ بندورة وفيك تزرع فاصوليا اي شي يخطر عبالك بس بدك خيطان لتخلي النباتات جالسة
الري بمحلول مغذي متل السابق ….واذا عجبك الانتاج والشغل سوي عليه بيت بلاستيك صغير ليصير انتاجك عمدار السنة
الماء والمحلول الزايد ينزل لتحت يخرج من الثقوب عفرشة البحص يسيل للمزراب الاستخدام مرة واحدة فيك تجمعه من تحت المزراب لسقاية نباتات الحديقة بس هو كميته قليلة كتير يعني مو مستاهل
اترككم مع الصور والاستفسارات بالتعليقات ورجاءا قراءة المنشور وفهمه قبل السؤال م.حسام الحسام