“قصة الخلبوص”
يا عزيزى حقيقة الأمر أن الخلبوص فى بداية القرن ال 18 هو صبى الغازية .. شخص اجرودى مفيش شعر ف جسمه لانه معاهم في كل شيئ كان بيلبس زى الغازية ، ويضرب ع الصاجات ، ويقلد حركاتها اللى كلها إبتذال ، ويهرج مع ده ويغمز لده ويهمس لده بشكل إباحى ومستفز ، ويهيئ الجو والقاعدة والمزاج ، وف الغالب كان له جملة شهيرة بيرددها علشان يحمى الغازية من الحسد ” 4 و 1 عليكى يا أبلتى ”
إتكلم عنه علماء الحملة الفرنسية وقالوا ” الخلبوص مهرج يقوم بأوضاع بالغة الفحش وبحركات وقحة تواكب حركات الغازية “.. بدأ ببدلة رقص من سنين طويلة وبعدها لبس الجلابية الضيقة ، ومع الزمن والتطور واكب الموضة ولبس البدلة والكرفتة .. أشهر الخلابيص كان تركى رقص 40 ليلة فى احتفالات افراح انجال الخديوى اسماعيل ، وشهرته طالت و نافست الحامولى والمظ وساكنة بك .
واول ما فتحت دور السينما بعض الدور جابوا الخلابيص وخلوهم يروجوا للافلام وقطعوا تذاكر .. على اساس ان عندهم موهبة فى الجذب .. عرفناهم ع الشاشة من خلال افلام شفيقة ومتولى وسيد درويش والراقصة والسياسى .. وكل فيلم فيهم اظهر مرحلة زمنية معينة فى تطور الخلبوص .
#مجلةعشناوشفنا
