من حكايا سوريا والسوريين..
حكاية “برج صافيتا”.. “جزء2”
وهلأ رح ابدا بالإسم ومعناه :
صافيتا بالسريانية يعني الصفاء.. صفاء الحياة.. الهواء الصافي الشافي.. ولفظ صافي تا : _صافي = النقي _ تا = الهواء.. صافيتا = الهواء العليل.. و الكنعانيين او الفينيقيين كانوا يسموا صافيتا.. باسم صوفي صيو وتعني الهضبة العالية المرتفعة ذات الهواء النقي العليل… وبالآرامية بتعني الصخرة العالية الملساء.. وكمان بالاوغاريتية مشتقة من صفو.. صفون صافون وتعني الصخرة العالية الملساء وبالأساطير الاوغاريتية صافون ( هو الجبل الاقرع) وهو بيت الإله بعل العلي.. و بالعهد الآشوري سموها لصافيتا باسم صيصيو..(نفس المعنى).. وبرج صافيتا سموه البرج الأبيض لانو مبنى من الحجارة الكلسية البيضا.. لهيك سموه اليونانيين القصر الأبيض بورغاس.. والروم سموه آرجيرو آكاسترود ويعني القلعة البيضا… وبأيام الحروب الصليبية سموه بيانكا شاشتي ويعني القلعة أو الحصن الأبيض…
ومتل ما شفنا بالحكاية بالجزء الأول انو صافيتا الواقعة بالزاوية الجنوبية الشرقية لطرطوس.. والمطلة عا تلات جبال مرتفعة هنن جبل النبي متى اللي فيه اكتر من 300 نبع ماء عذب.. وجبل النبي صالح.. وجبل النبي زاهر (اسمه غريب هالجبل واكيد فيه وراه قصة وحكاية.. رح فتش عليها)..
وبتتوضع صافيتا عا تلات تلال او قمم جبلية توأم.. هنن بالترتيب التل.. البرج.. الضهر.. و صافيتا عبارة عن تلات مدن متوضعة فوق بعضها نتيجة الزلال والبراكين قديما.. وبجنوب غرب صافيتا في سهل اكتشفوا فيه انوا بيحتوي على أكتر من 15 تل أثري بأحجام مختلفة متل تل كزل الموجودة فيه آثار مدينة سيميرا.. وطبعا بعد البحث والنقيب وجدوا لقى فخارية وبرونزية بالوادي الشمالي بالمناطق المحيطة بصافيتا.. أثبتت انو المنطقة كانت مأهولة من آلاف السنين.. و صافيتا القديمة مسكونة من زمن الفينيقيين كمان وجدوا فيها اكتشافات أثرية عديدة من ضمنها مستوطنات فينيقية كنعانية .. والدليل انو برج صافيتا (القلعة البيضا) مبنى على انقاض معبد فينيقي قديم من الحجر الكلسي الأبيض الضخم المنظم فوق بعضه.. فالاساس بالبناء هو فينيقي كنعاني مبنى وفق نظام هندسي قديم بيتميز بضخامة حجارته وعبقرية هندسة بناؤه اللي مالها مثيل بالعالم ويعتبر من أضخم واكبر الابراج القائمة لحد الآن بالعالم كله..
. وعالرغم من الغموض ببعض مراحل بناء القلعة ( البرج) .. الا انو المرجح انها قلعة فينيقية كنعانية تابعة لمملكة أرواد.. وفي احتمال بعصور لاحقة وجود قلعة بيزنطية فوق البرج اندثرت معالمها وأقيم البرج الحالي مكانها لكن الأساس الفينيقي بقي على حاله لحد الآن..فالقلعة والبرج مبنيين قبل المماليك والمسلمين والعرب والفرنجة والصليبيين..
طبعا كانت المنطقة غير مستقرة جيولوجياَ فاتعرضت لعدة زلازل بالقرن 12ميلادي..
واتناوب على احتلالها أقوام عديدة أخرها الفرنسيين وقبلهن العثمانيين.. و قديما الروم..المماليك ..الزنكيين..
الايوبيين..والصليبيين ..وفرسان الهيكل (فرسان الداوية يعني فرسان داوود) احتلوها ب 1112 ورجعوها الزنكيين ورجعوا احتلوها الصليبيين ورجعوها الايوبيين ورجعوا فرسان الهيكل احتلوها ورمموها بعد الزلزال اللي أصابها وعملوها مقرهن باسم برج الحصن الأبيض… وهون بدي عقب على هالنقطة ..هلأ في شي غلط منعرفوا.. وهو : قال شو!!! انو فرسان الهيكل هنن اللي عمرولنا البرج وقلعة الحصن ووو..وغيرها من الابراج والقلاع اللي كانت موجودة سلفاََ بالمنطقة من ايام أجدادنا الكنعانيين الفينيقيين.. والحقيقة وباختصار شديد انو فرسان الهيكل (فرسان الداوية) اجوا عا بلادنا كمحتلين وغزاة وصيادي كنوز .. هنن بالأصل اجوا بحجة حماية طريق الحج للأراضي المقدسة ( بيت المقدس).. وهدفهن الحقيقي السري هو البحث عن الكنز المقدس وعن الكأس المقدسة وتابوت العهد.. وطريق الحج كان عبر الأراضي السورية فعملوا مجازر وسرقوا ونهبوا واقتطعوا اراضي واحتلوا الحصون والقلاع على طول طريق الحج ( اللي كان جزء من طريق الحرير القديم بسوريا الطبيعية).. وطبعا كانوا يحفروا ويدوروا بطريقهن وياخذوا كلشي بيلاقوه من ذهب المعابد وآثار مهمة وغيرها..
وكبر عددهن وصاروا جيش قوي .. لان بسرعة رهيبة اتحولوا من مجموعة صغيرة لفرسان حماية للحجاج الجايين لبيت المقدس.. إلى أغنى وأثرى واكبر قوة مشكلة من الاوروبيين ايام الحروب الصليبية..
(ومافي مجال للتوسع بسيرة فرسان الهيكل فرجاءا َ اقرأوا تاريخ نشأتهن وأعمالهن وكيف اتشكلوا وشكلوا ثروتهن وحقيقة وجودهن ببلادنا و شو عملوا فيها.. )..
وقبل ما احكي عن موقع البرج.. بدي احكيلكن شوي عن أجدادنا السوريين الكنعانيين الفينيقيين اللي عمروا هالبرج والقلعة وغيرهن بكل المنطقة الساحلية.. أجدادنا اللي اخترعوا اول أبجدية واول نوطة موسيقية وصنعوا السفينة اللي خاضوا فيها السبع بحور اكتشفوا الزجاج. وصبغة الأرجوان.. وبرعوا بعلوم الفلك والحساب والجغرافيا اللازمين للملاحة والتجارة فكانوا أول مين استنبط او اكتشف خطوط الطول و دوائر العرض وحطوهن بخرائطهن التجارية ليستدلوا ويحددوا مواقع مستوطناتهن ومحطاتهن التجارية.. وهنن اللي اكتشفوا نجم القطب الشمالي لتحديد الجهات الأربعة الرئيسية.. وساهموا بتطور علم الجغرافيا نتيجة رحلاتهن التجارية والاستكشافية.. وابتكروا أعظم نظام هندسي للبناء اتوصلولوا بعد ملاحظة ومراقبة وبحوث وتجارب لحتى أبدعوا واتفوقوا بعلم الهندسة المتقدمة نتيجة معرفتهن بحقيقة انو الأرض محاطة بشبكة من خطوط القوى او الطاقة الكونية طاقة الحياة المتولدة خارج الأرض واللي بتخترق الأرض وبتنبثق منها بشكل عمودي عند نقاط او عقد معينة سموها مراكز طاقية الها تأثير قوي على الإنسان والنبات عالارض واكتشفوا قدرة الأشكال الهندسية على تجميع هالطاقة للاستفادة منها متل الشكل السداسي لنجمة كنعان والدائرة الكونية و الأشكال الثلاثية الأبعاد الهرم والموشور والمثلث والمربع والاقواس والقناطر.. الخ.. وصاروا يعتمدوا ببناء الهياكل والمعابد والأبراج و المدافن على هالأسس.. واولها واهمها الاعتماد على تحديد مراكز حقول الطاقة الأرضية لتكون قاعدة لمبانيهم الضخمة .. وتاني شي تحديد تطابق (او مقدار.. قياس) الزاوية بين الجدران لأي مبنى.. مع الجهات الأربعة الرئيسية.. وهالطريقة بالبناء بتحديد مراكز الطاقة الكونية ( طاقة الحياة) الموجودة بأماكن محددة بالارض بتعطي قوة للبناء وقدرات هائلة وعجيبة منها قدرات شفائية ووقائية.. الخ
أما بالنسبة لموقع برج صافيتا حسب فكر أجدادنا وتأكيد من دراسات حديثة. بيوقع بمركز حقل طاقة اهليجي.. (طبعا طبيعة جغرافيا ارض المنطقة استحكمت بشكله الاهليجي).. وحقل الطاقة بصافيتا بيدور من الشرق للجنوب للغرب للشمال.. واتجاه الدوران هو اللي حدد خطوط طاقة مبنى البرج بالنسبة لمحيطه وفق النظرية الهندسية للبناء المعتمدة من قبل أجدادنا… (وهيدا السبب اللي خلا الناس مثلا يعتقدوا ويآمنوا انو لبرج صافيتا قدرات شفائية وعلاجية ووقائية وبيطرد الأرواح الشريرة.. الخ..يعني مو خرافة.. في شيء من الصحة) ..
فصار البرج بهالحالة بيشبه الشمس بموقعها بالوسط وحقل الطاقة حوله بيشبه مدار الأرض الاهليجي حول الشمس.. و بتتَوضع الأبنية القديمة على أربع خطوط متتالية من الخطوط الاهليجية وبشكل هندسي جميل.. وموقع البرج كمركز شاهق الارتفاع وحوله مجموعة من القلاع والأبراج المحيطة بصافيتا بيخضع لنفس التفسير.. وهالشي أعطى لموقع البرج أهمية استراتيجية بإشراف على سواحل المتوسط.. وكمشرف. حامي للعمق الجغرافي بالمنطقة…
أما عن موقعه :. فعلى القمة الوسطانية بصافيتا اللي اسمها البرج.. بيتوضع برج صافيتا الشهير وهو الوحيد الباقي من القلعة وبيتربع على أعلى قمة بالمنطقة فوق هضبة صخرية مستديرة ملساء.. بتمثل ذروة الجبال التلاتة اللي بتتوضع عليها مدينة صافيتا بالشعاب الجنوبية لجبال البهرة بسلسلة الجبال الساحلية .. وبيبعد البرج عن مدينة طرطوس حوالي 25كم وعن البحر حوالي 15كم بخط مستقيم.. ويرتفع عن سطح البحر 420م وارتفاع بناء البرج 27م..
ويعتبر منطقة وسطى بين أرفاد (أرواد) وأرادوس (طرطوس) وبيشرف عا تريبولي (طرابلس) وعالدريكيش وقلعة شبتون (الحصن) وبيت خيخي (حصن سليمان) وقلعة ام الحوش وقلعة أريما (العريمة) وقلعة العليقة وبرج ميعار وقلعة يغمور الحمرا (يحمور) .. وفي أبراج ربط مع قلعة مركابوس مرغات ( المرقب) و حصن (الكيكة) وحصن مركاس (مرقبة) وتل سمارا ومدينة كارينا… وبيشكل شبكة اتصال مع هالقلاع بالنيران ليلا والدخان نهارا وهيدا هو دور البرج الرئيسي بموقعه المشرف عا كل ما حوله من قلاع وابراج.. كبرج مركزي للاتصال بتبادل الإشارات عا مستوى الساحل السوري.. وبيمر بمناطق صافيتا نهر العوجان والابرش ونهر الغمقة الموسمي اللي بيتدفق من بين الصخور كنوفورة قوية.. وكمان في بصافيتا ينابيع قوية متل نبع الغمقة و عين الشرقية وعين الحداد (البازلتية) وعين سركيس وعين مرعي (الكلسية)..
أما عن أقسام البرج : _ الأساسي فينيقي ( متل ما حكينا وهو مغمور تقريبا َ) ولكن أساسه بيظهر بالجهة الشرقية والشمالية ..
_الطابق الأرضي : وهو عبارة عن أقبية سقوفها نصف دائرية بشكل العقد الحجري وجدرانها سميكة (4م)…وتحت البرج مستودعات وسراديب (غير معروف لوين بتودي) وممرات متشعبة من اقبيتها..
وفي بركة ماء لتخزين مياه المطر.. مربعة ومنحوتة بالصخر مع درج للنزول للبركة.. وهالقسم واسع مسدود ومغلق الجوانب وارضه مظلمة تسربت فيها المياه.. وفي بعض المسالك المظلمة الموصولة بأقبية القلعة وسراديبها اللي بتنتهي خارج أسوار المدينة.. و بيحكوا انو في ممر تحت الارض بيوصل من القلعة لخارج السور كان يساعد المدافعين للهروب ولتأمين المؤونة والعتاد.. ومعظم هالممرات انهدمت ومابقى منها الا القليل..
_الطابق الأول : وهو حاليا َ عبارة عن كنيسة.. وبيقسم هالطابق قوسين.. الأول بيبعد 6م عن الباب الداخلي.. والتاني بيبعد 12م.. و بالوسط في فتحة قليلة الارتفاع.
_ الطابق التاني : اسمه القاعة الكبرى وهو قائم فوق كنيسة البرج و هو عبارة عن صالة مفتوحة فيها نوافذ ومرامي سهام غميقة ( للدفاع عن البرج) وتم تصميم وبناء هالطابق بالقرن 13م.. وهو قائم على تلات ركائز من الاعمدة الضخمة البارزة ( والعجيب انو مافي بالطابق الأول اعمدة بتقابلها وهالشي يعتبر معجزة هندسية مخالفة لكل النظريات العلمية الخاصة بالهندسة).. وبيستند على الاعمدة عقود مقابلة شديدة الانحناء..
_الطابق التالت : وبيفصله عن التاني درج حجري (66درجة) متوضع بقلب الجدار (وحالته سيئة حاليا َ) ومضاء بكوتين (طاقتين) صغار.. وارضه كانت مفروشة بالتراب.. وهلأ مفروشة بالإسمنت .. وبيتألف السقف من 8 عقود حجرية ضخمة مربعة قائمة على 4 ركائز حجرية من الأعمدة الضخمة وهي بشكل متصالب ومنسقة بتمتد من الشرق للغرب. وبتقسم القاعة لقسمين وبكل جهة في نوافذ اهليجية وهي بنفس الوقت مرامي سهام غميقة ..
_السطح : فيه مجموعة شرفات بتطل عالأفق مازال معظمها موجود و محتفظة بفتحات جميلة وهي مبينية ومنحوتة من الصخر بدقة عالية وعناية فائقة.. و عالسطح كان المدافعين عن القلعة يعملوا اتصالات بالاشارة بواسطة النار والدخان مع القلاع المجاورة لهلأ بعدوا موجود المشعل اللي كانوا يشعلوا فيه النار عند حدوث الطوارىء فكانت تروح الإشارة من برج تل لحا.. لقلعة العريمة.. لبرج صافيتا.. ومنه تنتقل للمنطقة الوسطى عبر قلعة الحصن.. لقلعة حمص.. لقلعة حماة.. بعدين لقلعة خان شيخون.. ومنها لمعرة النعمان وتنتهي الإشارة بقلعة حلب.. وكانت بالليل نار وبالنهار دخان وكانوا يستخدموا مواد خشبية منوعة بتعطي أشكال وألوان خاصة لتمييز الإشارة..
_السور : كان بناؤه مرتفع وواسع لكن مع الزمن انهدم واتعمرت فوقه وداخله ومن حجارته البيوت لحتى التصقت بالبرج وهيك اتشكلت البلدة القديمة صافيتا.. وفي قسم من السور الشرقي مازال قائم مع بوابته الجميلة( هيدي اللي حاولوا يرمموها من فترة وعلى عجل بشكل سيء ومغاير لصفات وطبيعة بناء البوابة وهويتها) ..
والسور مزدوج وبيتألف من سورين.. داخلي محيط بالبرج.. وخارجي شكله بيضوي وطوله 1كم وكانت جدران السور ناعمة ملساء .. وبين السورين كان في خندق… يملا بالماء من الخزان الموجود بالطابق الأرضي وكان يمنع الوصول للبرج الا من معابر خاصة أنردمت معظمها وزالت معالمها.. وكان في مجموعة من الاقبية بتوصل بين البرج والاسوار وبتتلاقى بغرفة تحت البناء ممكن نوصلها عن طريق باب بالجهة الجنوبية للبرج.. وجنب البرج كان فيه بير ماء مقدس مبنى بالحجارة الكلسية بعمق 1م.. كان يغذي القلعة بالماء وموصول مع آبار فرعية موزعة بالأحياء القديمة بصافيتا…
هيدي كانت حكاية برج صافيتا القصر الأبيض.. احد المعالم الأثرية المهمة ببلادنا واللي مازال باقي بشموخه وكبرياؤه لحد الآن واللي كل حجرة من حجارته بتحكي تاريخ وثقافة وحضارة أهل المنطقة السوريين اللي تركوا فيها حكايات للزمن بتشهد للتاريخ انو السوري ابن هالبلد هو اللي عمرها و جملها وسواها بالحب والمحبة وحولها لجنة من جنات الأرض..
حييتوا يا صافتلية.. حييتوا يا سوريين..
وتحيا سوريا دايما َ….
