حكاية “التلال”.. (6)..
تل “البيعة _توتول”
مدينة اﻹله دجن اللي بعدو عايش بيناتنا..
و”لوحات فسيفساء توتول “.. المؤرخة من العصر اﻵكادي باﻷلف التالت ق.م .. والمشهورة بكل العالم ونحنا أصحابها مو سامعين فيها!!
بالجزيرة السورية على بعد 3كم شمال مدينة الرقة عند ملتقى نهر الفرات برافده نهر البليخ ..موجود تل البيعة أو مدينة توتول اﻷثرية التاريخية فوق بروز أرضي من ضفة النهر .. وبيفصله عن باقي التلال منخفضات حوارية وبيخترقه خندق هو عبارة عن قناة قديمة لجر المياه بترجع لﻷلف التالت ق.م ..
انعرفت مدينة توتول من خلال ذكر اسمها بالوثائق المسمارية الرافدية باﻷلف التالت ق.م.. وبوثائق رقيمات تل مرديخ “إبلا” وتل الحريري “ماري” ..
وورد اسم توتول أكتر من مية مرة واسم أمير توتول واسم أحد ملوكها (يا خلو كو ليم)..وطبعا انذكرت اﻷوضاع السياسية واﻹجتماعية والدينية وخصوصا عبادة اﻹله دجن ..وأوضاع التجارة وطرق السفر وموقع توتول اﻹستراتيجي المهم وغناها بالغذاء ووفرة الغلات الزراعية فيها .. وعلاقاتها مع جنوب الرافدين وعيلام وكل أنحاء سوريا الداخلية وحوض البليخ وتل خويرة وبلاد بابل وآشور..من عصر حضارة أوروك لعصر سلالة أور التالتة والعصر البابلي القديم لعصر سرجون اﻵكادي ..
وبتذكر النصوص انو سرجون اﻵكادي صلى بمعبد دجن اله مدينة توتول أثناء حملته لتوحيد اﻹمبراطورية.. وانو حفيده نارام سن طلب من دجن المساعدة على تدمير مدينة إبلا القوية…
وبتقول الأخبار سرجون انو أخد اﻹذن من اﻹله دجن ﻹستكمال فتوحاته واستمد منه السلطته فمنحه دجن البلاد العليا من سوريا واﻷناضول..فانطلق من توتول بفتوحاته ..طبعا بسبب مميزات المدينة (غناها بالغذاء وزراعتها المتطورة جدا وموقعها اﻹستراتيجي)..
والحكاية المشهورة عن سرجون انو عدد أفراد جيشه الكبير (بالنسبة لهداك الزمن) 4800 شخص كانوا ياكلوا يوميا على موائد توتول وبحضرة سرجون اﻵكادي.. وكل هالشي بفضل اﻹله دجن حامي سرجون واللي حققلوا سطوة ما الها منافس بكل البلاد…
وآخر مرة انذكرت توتول كانت بالقرن ال12 ق.م لما اتلاشت أهميتها وهجرها سكانها وبالقرن التالت ق.م بنوا السكان مدينة جديدة بجنوب توتول سموها (نيكفوريون) واتحولت لمقبرة وبالقرن السادس ميلادي شيدت كنيسة فوق أطلالها القديمة المفروشة أرضياتها بمشاهد فسيفسائية رائعة..ومن وقتها صار اسم توتول ..تل البيعة..
وانعرفت توتول من خلال ذكرها بالرقيمات فبدأ التنقيب عنها من سنة 1980 بدعم وتمويل من جمعية اﻷبحاث اﻷلمانية (كرم أخلاق من اﻷلمان طبعا )..
المهم كشفت التنقيبات اﻷثرية بتل البيعة عن وجود المدينة التاريخية توتول واللي بترجع بتاريخها لعصر أوروك 4500 ق.م وكانت كثيفة السكان ومحصنة بأسوار عالية..واشتهرت بصناعة الفخار والخزف (اكتشف مشغل ومصنع وفرن لصناعة الفخار (أواني وألواح وجرار وغيرها).. ومشاغل صناعية للتعدين..
ومن العصر اﻵكادي اكتشفوا لوحات فسيفساء رائعة اشتهرت عالميا باسم ” لوحات فسيفساء توتول” يمكن موجودة بمتاحف ألمانيا ..و نحنا ما منعرف عنها شي..وطبعا اكتشفوا مجموعة من اﻷختام من نفس الفترة ..باﻹضافة لمعابد من النماذج اللي كانت منتشرة بسوريا والمعروفة ب (المعابد الرواقية أو ذات الرواق) وأهمها وأكبرها معبد ومركز عبادة اﻹله دجن ..وكمان عدد من القصور من مختلف العصور ..وأهم المكتشفات هي الرقيمات المسمارية المميزة بطبيعتها اﻹدارية والرقم اللي بتلقي الضوء على أهمية مدينة توتول اقتصاديا وسياسيا وكمركز ديني ضخم..وطبعا كشفوا مجمعات لأبنية مختلفة سكنية وبداخلها مواقد وتنانير وبيوت مونة ومستودعات..ومجموعة من المقابر خارج اسوار المدينة مبنية من الطوب غير المشوي..ومقابر ملكية من اﻷلف التالت ق.م…أنا عم احكيلكن حكاية مختصرة عن تلة أثرية مهمة جدا جدا ..وهي وحدة من أصل أكتر من ألف تلة موجودة بالشمال السوري ..كشواهد على تاريخنا ..
.وبيقولوا انو كل هاﻵثار المكتشفة كانت موجودة بمتحف الرقة قبل الحرب.!!!!!!!
وبيقولو انو اﻷمريكان مع العصابات اﻹرهابية هربوا اﻻثار بالطائرات ..
ونحنا منقول انو عملية فصل السوريين عن تاريخهن مستمرة بكل الوسائل والطرق ومن كل الدول اللي عم تحاربنا.!!!!!!!