الاجراءات النظامية تجاه انتهاك الحقوق الفكرية للمصور
بقلم: مهند العوينان
بسم الله الرحمن الرحيم ..
أسعد الله صباحكم / مسائكم بكل خير ..
بهذا الموضوع راح اتكلم عن تجربتي في رفع دعوى ضد صحيفة استخدمت صورة من تصويري بدون اخذ اذن مني وبدون موافقتي, حتى يعرف كثير من المصورين انهم يقدرون يطالبون بحقوقهم رسمياً و بدون محامي, و ياخذون حقهم بالكامل من الصحيفة أو الجهة المسؤولة عن سرقة الصور.
اللي يجهله كثير من المصورين أن فيه إدارة بوزارة الثقافة و الإعلام أسمها “إدارة حقوق المؤلف” و هي متخصصة برد الحقوق لأصحابها.. سواء كانت صور فوتوغرافية أو فيديو أو حتى الحقوق الصوتية و غيرها.
ما حبيت أسرد لكم قصتي مع القضية بالتفصيل , لكن راح اخليها على شكل نقاط حتى تستفيدون منها أكثر, أول ما تسرق لك صورة سوي الخطوات هذي :
1. اشتر نسختين من الجريدة أو الصحيفة المنشور بها صورتك ( نسخة تسلمها للوزارة و نسخة تبقى معك ) .
2. توجه لإدارة حقوق المؤلف بوزارة الثقافة و الإعلام , و أطلب منهم “صحيفة الإدعاء” , و اذا كنت من خارج الرياض تقدر تتصل بهم و يبلغونك بأقرب فرع لهم, أو ممكن يرسلون لك صحيفة الإدعاء بصندوق البريد مثل ما سوو معي وهذا رقمهم : 0114425324 تحويلة المصنفات الفنية 107 أو 106 .
3. صحيفة الإدعاء عبارة عن 5 أو 6 صفحات .. تعبيها, يطلبونك معلومات شخصية للتواصل و معلومات عن الصورة المسروقة و عن الجهة اللي استخدمتها و طلباتك و معلومات تفصيلية اخرى , ممكن تعبيها بـ”نص ساعة” كأقصى مدة.
4. في خانة الطلبات, حاول تكتب أعلى مبلغ تتصوره , لأنه لو كتبت مثلاً 10 آلاف بينما حقك 30 ألف .. راح يحكمون لك بـ10 لأن هذا طلبك, لكن أطلب أعلى مبلغ , اللجنة راح تقدر قيمة الصورة و الأضرار اللي حصلت عليك و تعطيك حقك :) , ولا تنسى تطلب إعتذار رسمي بالجريدة , غير الطلب المادي :) .
5. جهز قرص CD يحتوي على :
– الصورة الأصل “من الكاميرا مباشرة” و إذا هناك معالجة للصورة ألوان أو غيره ارفقها قبل و بعد المعالجة .
– رابط الموقع او التغريدة اللي انت نشرتها به قبل يسرقونها الجريدة .
– صورة الخبر من الموقع الالكتروني للصحيفة .
6. جهز ملف أبيض يحتوي على :
– صحيفة الإدعاء بعد تعبئتها .
– قرص CD بعد نسخ البيانات له.
– نسخة من العدد المنشور به صورتك.
– صورة من بطاقة الهوية الوطنية.
– معلومات للتواصل ( رقم الجوال / العمل / صندوق البريد / البريد الالكتروني ) .
7. الملف هذا اذا كنت بالرياض وده للادارة , و اذا كنت برى الرياض تقدر ترسله بالبريد الممتاز على العنوان التالي : الرياض / وزارة الثقافة و الإعلام / الإدارة العامة لحقوق المؤلف / قسم حماية المصنفات الفنية.
8. راح يتواصلون معك و يبلغونك بموعد الجلسة للحكم بخطاب رسمي, طبعاً تقدر تحضرها وتقدر تعتذر و راح يصدر الحكم و يبلغونك فيه بخطاب ثاني.
بين الخطوة 7 و 8 هنا أطول وقت .. ويجلس بالأشهر .. لانهم راح يتواصلون مع الصحيفة و يشوفون ردها .. و اذا اكتمل ردها قضيتك راح تطول قبل تدخل على اللجنة لأن فيه قضايا كثيرة قبلك :) .
الخطوات هذي عن تجربتي الشخصية, رفعت قضيتين الأولى كسبتها بفضل الله و الثانية مازالت تحت الدراسة, قد يكون هناك تغيرات لاحقاً بآلية رفع الدعوى, لكن تقدر تتصل عليهم و تتأكد من الخطوات بنفسك..
لا أحد يسكت عن حقه :) .. و اتمنى لكم التوفيق :)
اتشرف بتواصلكم :
مهند العوينان @Mohanadoy
نهاية المقال،
