ورشة سينما
٢٠ أبريل ٢٠١٤ ·
خدعة تصوير
الصورة دي قابلتني على النت امبارح وناس كتير بيسألوا بتتصور ازاى
هيا خدعة بسيطة جدا
اعتمدت على حاجتين
خدعة المسافة
وعدسة الكاميرا
خدعة المسافة ان الكوتشي محطوط ادام الكاميرا بالظبط والواد بعيد عن الكاميرا ممكن بمتر او مترين لكن رجليه ورا الكوتشي مش جواه فظاهر ان رجليه جوا الكوتشي عشان رجليه والكوتشي على نفس الخط
فالحاجة اللي جنب الكاميرا بالظبط بتظهر كبيرة بالشكل ده واللي بعيدة بتظهر اصغر فبتيجي خدعة المسافة بالشكل ده
تاني حاجة عدسة الكاميرا
الصورة دي متاخدة بعدسة قصيرة البعد البؤري مثلا بين 20:10 مم
العدسات القصيرة دي معروف عنها انها عدسات مشوهة بتشوه الأشكال وبتشوه المسافات والاحجام
تشويه الاشكال بحيث ان العدسة اول ما بتقل عن 16 ملل بتبدأ تتقعر وبتظهر الاشياء المصورة وبالاخص القريب منها بصورة مقعرة ومشوهة
تشويه المسافات بمعنى ان فيها عمق ميدان كبير جدا اكبر من اللازم فالمسافات بتزيد بين الاشياء اللي جوا الكادر زى ما شايفين في الصورة احنا حاسين ان المسافة بعيدة جدا بين الشخص اللي قاعد وبين الكوتشي ودا احساس عملته العدسة
تشويه الاحجام زى ما قلت ان الحاجة اللي جنب العدسة بتظهر كبيرة جدا واللي ابعد بتظهر بصورة صغيرة جدا ودا اللي ظهر في الصورة
تحياتي
Hussein bashandi