المعرض العام افتتح الحمد لله وأكيد كل عمل جماعي بالحجم ده له سلبياته واكيد له إيجابيات أكتر.. المعرض بيرصد جزء كبير من الحركة التشكيلية المصرية ومن مصلحتنا اننا نأكد علي الإيجابيات شوية ونبعد عن السلبيات لأن اكيد في تعب ناس كتير جدا خلف هذا الحدث من أول القومسير والمسؤلين وموظفي المتحف لحد العامل اللي تسلم ايده اللي شارك في دهان المتحف وخلاه بالشكل ده في أقل من شهر.. انا مشاركتش لأن المعرض العام بالنسبة لي كأنه بينالي دولي ولازم أقدم حاجة تليق بيه. وكنت مشغول بمعرضي الشخصي ولكن انشاء الله هشارك بندوة.. في نقاد مصريين متخصصين مشاركين بتحليل ورصد الأعمال المعروضة.. واحنا مش عايزين نبتدي بنشر السلبيات لأن كفايه أحداث كتيرة في مصر بيموت فيها الحلو الكتير بسبب التركيز علي نقطة سيئة واخرهم صالون الشباب ومهرجان السينما ومش هدخل في تفاصيل حاجات كتيره في البلد.. بس خلونا بجد نشوف النص المليان المرة دي وهو تجهيز متحف الفن الحديث بالسرعة الرهيبة دي؟؟ المتحف ده انا بداخله أسبوعيا منذ سنتين كل يوم خميس الصبح بحكم عملي كعضو لجنة وكل ما بدخل من باب المتحف بشعر وبحس بالحزن الشديد لهذا المبني المهجور المظلم اللي مخازنة مليانة كنوز تقدر بمليارات ومش شغال فيه الا الدور الأرضي فقط.. لما دخلت المتحف من الباب يوم افتتاح المعرض العام مصدقتش نفسي ان اشوفه كله منور ومليانة شغل وزوار بالحجم ده… خلونا نركز علي الحلو في المعرض العام ونبارك للعارضين وندي مساحة للاساتذة النقاد المتخصصين يقيموا العرض.. بس خلونا نركز بس بمطالبة السيده وزيرة الثقافة والسيد الدكتور خالد سرور رئيس قطاع الفنون التشكيلية.. بعدم غلق المتحف مرة أخري ابدا.. اللي اتجهز في شهر.. وان يتم افتتاحه بكنوزنا التشكيلية اللي الناس بتقف علي اي عمل منها بالطوابير خارج مصر.. فورا بعد المعرض العام.. وأؤكد فورا بعد المعرض العام. لابد أن يفتتح المتحف ولا يغلق مرة اخري. المتحف كان مهجور بمعني الكلمة لكن حاليا منظر يسعدك لما تشوف كل الأدوار مليانة ناس… انحني احتراما لكل واحد عمل لمسه إيجابية في هذا الحدث وكل واحد هيتكلم عن إيجابيات هذا الحدث.. ومتنسوش أن العالم كله متابعنا وبيتفرج علينا ولازم نثبت أن احنا اللي مش عايزين نرجع لورا.
مبروك النور اللي نور في متحف الفن الحديث.
أيمن لطفي
#متحف_الفن_الحديث
